Þá erum við mæðginin loksins komin heim í faðm fjölskyldunnar. Prinsinn var tekinn með keisara kl: 20:39 mánudaginn 13. apríl. Þessi dagur hefur verið viðburðaríkur í fjölskyldunni en við Kjartan byrjuðum saman þennan dag fyrir 5 árum síðan og fyrir 4 árum bað hann mín og ég sagði já . Einnig á Andrea Ösp stórfrænka í DK afmæli þennan dag.

Pilturinn var aðeins stærri en við áttum vona á en hann var 3950g (16 merkur) og 54cm, veit ekki alveg hvaðan þessi stærð kemur en þess má geta að systir hans var aðeins tæp 13 merkur og 49,5cm. Hann er samt rosalega fíngerður og nettur og alveg yndislegur í alla staði . Hann er voða vær og sefur mest allan sólarhringinn. Hann gleypti smá skítugt legvatn þegar verið var að ná í hann og fékk sýkingu í annað lungað. Hann var því á vökudeildinni í 3 daga til eftirlits og sýklalyfjagjafar.

Ég hef það annars bara mjög fínt og líður miklu betur núna en eftir síðasta keisara. Veit ekki hvað það er en ég finn miklu minna til í skurðinum og get gert miklu meira. Vona því að ég eigi eftir að jafna mig fljótlega.

Silja María er í skýjunum með litla bróður og er alltaf að kyssa hann og knúsa, stundum heldur til of mikið hehehe.... Hún vill alltaf vera að sýna honum hitt og þetta og segja honum frá því sem hún er að gera, skilur kannski ekki alveg hvað hann er lítill.

Ég á svo eftir að setja inn flokkana "um mig" og " fæðingin mín" fljótlega.

Nýjar myndir komnar inn.....

Kjartan er byrjaður að klifra í Klifurhúsinu og hefur það skilað sér í nokkrum rifnum blöðrum á höndunum. Áðan var Silja María að skoða hendurnar á pabba sínum og sagði "Æ æ kallinn minn, varstu að meiða þig? Viltu plástur?"

Kjartan varð fyrir því óhappi í gærmorgun að það var keyrt í veg fyrir hann í hringtorgi og stuðarinn beyglaðist aðeins og ljósið brotnaði á trukknum (hefðuð samt átt að sjá hinn bílinn sem þurfti að draga í burtu). Silja var nú ekki ánægði með þetta og hafði miklar áhyggjur af pabba sínum. Hún spurði hvort bíllinn væri ónýtur og hvort pabbi ætlaði ekki að skamma strákinn. Pabbi sagði að löggan myndi sjá um það. Eftir nokkra stund sagði hún "en pabbi, þetta var alveg óvart" heheh...

Loksins komnar inn einhverjar myndir eftir langan tíma. Setti inn 3 ný albúm með myndum af skvísunni og fjölskyldunni. Ekki neinar bumbumyndir komnar enn þá en koma vonandi einhverntíman   Annars er skvísan lasin og búin að vera síðan á sunnudag. Hún er með hita, ljótan hósta og hor og verður örugglega heima á morgun líka. Hún er orðin ansi leið á því að hanga inni greyið og líka foreldrarnir.

Vegna fjölda áskoranna þá höfum við sest niður í Perlukórnum og tekið saman hvað hefur á daga okkar drifið síðasta mánuðinn - hérna er brot af því :o)

Silja María fór með pabba sínum í bíó í fyrsta skipti í desember. Um var að ræða hópferð með vinnunni hans Kjartans á Madagascar 2 og fengu þau feðginin sér popp og Svala og nutu THX hljómgæðanna. Silja var svo spennt að Kjartan þurfti að fara með hana á klósettið fjórum sinnum. Einu sinni rétt fyrir hlé, tvisvar í hléinu og að lokum þegar 1 mínúta var eftir af myndinni. Hún var svo rosalega ánægð með þetta allt saman að hún má ekki sjá ljón, gíraffa, flóð- eða sebrahest án þess að kalla "Madagascar!", og eitt af uppáhalds lögunum hennar núna er þegar pabbi hennar syngur "ég fíl'að dilla dilla" - það vekur mikla kátínu hjá henni og hún syngur "ég fíla fíla dilla" á móti.

Silja var ekki lengi að fatta þetta með skóinn og gluggann og fékk líka fullt af flottu dóti frá Jólasveininum. Það kom þó fyrir einu sinni að jólaspenningurinn fór alveg með hana og hún var soldið óþekk við að fara að sofa - en þá sögðum við henni einmitt að Jólasveinninn myndi fara framhjá glugganum ef hún myndi ekki vera sofandi upp í rúmi á ákveðnum tíma. Sú stutta þráaðist við og viti menn, hann kom ekki þá nóttina. Við vorum hálf fegin að hann skildi sleppa því að koma frekar en að koma með kartöflu, því við erum hrædd um að henni finnist kartöflur svo góðar að það sé bara í fínasta lagi að fá svoleiðis í skóinn ;o) Hún kippti sér ekkert upp við það að fá ekkert í skóinn, heldur sætti sig við að hún hafði farið of seint að sofa og ekki hlýtt mömmu og pabba og því hafði Jólasveinninn ekki komið - þetta lofar góðu fyrir foreldrana. Hún hafði einu sinni á undan því verið mjög tæp á að fara að sofa á réttum tíma, og við töldum að einn lítill súkkulaði moli myndi vera "smá" í skóinn...en svo reyndist ekki, hún var hæstánægð með litla súkkulaðið sitt, sem kenndi okkur foreldrunum að hlutirnir þurfa ekki að vera rosa stórir og dýrir til að gleðja lítil hjörtu.

Alveg dásamlegt hvað maður lærir mikið af litlu börnunum sínum.

Þær æðislegu fréttir eru líka að Silja María er alhætt með bleyju. Hún hætti að vera með bleyju á daginn í ágúst en var alltaf með á nóttinni, svo í kringum jólin þá var hún búin að vera þurr svo lengi að við kipptum henni af og viti menn... Silja er orðin "stór stelpa".

Svo er hún búin að læra fullt af frösum af okkur og spara ekki hrósið ef henni finnst eitthvað vel gert. Þegar maður klárar matinn af disknum þá heyrist of "Alveg búin(n), flott hjá þér! Dugleg(ur)!" og þegar maður sinnir hinum ýmsu húsverkum má oft heyra í bakgrunni, "frábært hjá þér", en þá er sú stutta búin að vera fylgjast með manni og er greinilega sátt við afraksturinn. Hún er líka rosa dugleg að þakka fyrir sig og er mjög nösk í að vita hvenær hún á að vera "stór" (þegar hún vill gera eitthvað sjálf) og hvenær hún er "lítil" (þegar hún vill láta gera hlutina fyrir sig).

Við erum að vinna í að setja inn nýjar myndir og munum svo (ef þið eruð dugleg að skrifa athugasemdir) koma með fleiri mola úr lífi fjölskyldunnar von bráðar. Læt hér fylgja með mynd sem var tekin af sætustu skvísu bæjarins á aðfangadag

Silju Maríu gengur rosalega vel í aðlöguninni á Kór og vill hún helst ekki fara heim eftir aðlögunartímann. Finnst reyndar að það mætti stytta þennan aðlögunartíma aðeins þar sem að hún er leikskólavön en það verður víst allt að fara eftir settum reglum. Hún verður til kl 14:00 á morgun og svo allan daginn á föstudag. Við ætlum svo líklega að kíkja á jólaball hjá gamla leikskólanum á laugardag og það verður gaman að sjá hvað hún segir þegar hún sér alla krakkana þaðan. Hún fór með 2 bækur síðasta daginn og gaf deildinni sinni í kveðjugjöf og voru allir mjög ánægðir með það.

Silja María er orðin duglega að reyna að klæða sig sjálf og var hún að fara í náttbuxur áðan. Þetta gekk eitthvað erfiðlega hjá henni og var hún orðin soldið pirruð. Þá sagði hún "Ohh þetta er svo öfugsnúið" hehehe... Ég hef aldrei notaði þetta orð við hana þannig að þetta hlýtur að vera eitthvað sem hún hefur heyrt á leikskólanum. Svo er náttúrulega Latibær í miklu uppháldi og Kjartan er ekki lengur pabbi heldur kallar hún hann alltaf Íþróttaálfinn. Svo á hann að koma og bjarga henni úr ýmsum aðstæðum því hún er Solla Stirða .

Setti inn nýtt albúm með myndum frá Urðarhóli. Bæði gamlar og nýjar...

Vorum að fá það staðfest í vikunni að Silja María er komin með leikskólapláss á Kór sem er hérna rétt fyrir neðan okkur (í Baugakór). Vorum eiginlega búin að gleyma að við hefðum sótt um flutning en við gerðum það um leið og hún byrjaði á Urðarhóli þar sem hann er ekki í hverfinu okkar. Silju Maríu líkar mjög vel á Urðarhóli og okkur foreldrunum finnst hann frábær leikskóli þannig að við vorum pínu treg að taka ákvörðun um hvort við ætluðum að þyggja plássið á Kór eða ekki. Við fórum yfir alla kosti og galla og fórum að skoða Kór í dag og komumst að þeirri niðurstöðu að það yrði líklega best fyrir alla að taka plássið á Kór . Það er náttúrulega mjög hentugt að hafa leikskólann í næsta nágrenni og svo á Silja örugglega eftir að eignast vini í hverfinu. Líka þegar ég fer í fæðingarorlof verður munur að geta labbað út og sótt hana. Kór er heilsuleikskóli eins og Urðarhóll þannig að stefnan er sú sama og umgjörðin eins. Silja fer á deild sem heitir Tryggðarlundur og þar eru bara börn fædd 2006. Okkur leist mjög vel á deildina og starfsfólkið. Hún byrjar líklega í aðlögun 24. nóvember (eða 1.des).



Fleiri myndir á leiðinni inn .